MARKA vel MARCHIA

MARKA, vel MARCHIA

German. Mark, significat regni aut provinciae alicuius terminum: unde Marchiones, limitum Praefecti. Item regio Aquitaniae, in agro Lemovicino, la Marche de Limosin, sic dicta, quod inter Bituriges Cubos et Lemovices posita. Aquitaniae gentibus undique cingeretur. Dividitur in superiorem la haute Marche, et inferiorem la basse Marche, quod sub montibus iaceat. Hanc regionem ab Auberto Comite, Henrico Anglorum Regi venditam, A. C. 1170. refert Rogerius Hovedenus. Isabella dein Regina nupsit Hugoni le Brun, Comiti Marchiae A. C. 1258. Thomae Walsinghamio dicitur Marchia Vasconiae, forte quod inter Franciam et Comitatum Tolosanum provinciamve Narbonensem, tum Vasconiae nomine designari solitam, posita est. Et certe hodieque per iocum cives urbis Lemovicarum Gascons de Limoges, quod a Vasconum finibus non longe absint, appellantur. Vales. Notit. Gall.